poemes de xabel vegas

Xabel Vegas publica los sos poemes n’asturianu, Ye una poesía emparentada a les veces col grafitti, de poques pallabres, sintética, como flashes o como aforismos, con una carga personal perimportante.

"Siempre me ha gustado que la música parezca poesía y que la poesía parezca música"

Tierra Moyao

Yo nun fundí les manes
na tierra moyao. Non.
Yo nun manché les botes
col barru del camín
que s'abre pente la borrina.
Yo nun caleyé per pindios montes
nin besé a moces baxo la solombra
d'un texu milenariu.

Yo nun pasé tardes de Seronda
al calor del llar.
Nunca nun sentí na nuca
l'aliendu fúnebre
del aire les castañes.
Yo nun tuvi casa vieya.
Nin tastie l'arume
de la yerba recien segao.

Yo nun fixi nada d'eso.
Nun podéis, entós, llamame poeta.

La resaca

A veces,
con galerna y alta mar,
préstame pasiar pola playa.
Préstame comparame
cola inmensidá del océanu.
Sentime cercanu a la nada.
Tan pequeñu que los problemes,
les duldes y hasta la vida mesma
podríen desapaecer arrastraos
pola resaca que dexa la fola
al romper, violenta, escontra'l pedreru.

Pero la mar devuelve
tolo que traga a la costa.
O eso dicen, al menos.
El cadabre d'un home,
los restos d'una nueche de sexu seguru
o quiciabes un mensaxe dientro d'una botella
escrito n'otru llugar, n'otru tiempu.
Asina esta tarde la marea
apurrióme'l to recuerdu.
Esos besos húmedos qu'un día
tiré a la mar del escaezu.

Canción Nocturna

Ven.
Échate al mio llau.
Quédate conmigo hasta qu'alboreza,
hasta que la mañana seya
una catástrofe nuclear.

A la una la madrugada
contaremos histories
que mos faigan rir
hasta llorar.

A les dos de la madrugada
llamberémonos los llabios
como si fuéremos críes d'animales.

A les tres de la madrugada
follaremos con fuerza
como si mos odiásemos.

A les cuatro de la madrugada
falaremos de los fíos
que dalgún día tendremos.

A les cinco de la madrugada
comeremos chocolate
dexando que se derrita
nel cielu la boca.

A les seis de la madrugada
fadremos planes
pa una vida en común.

Y cuando alboreza
y sintamos el cantar
de los últimos borrachos na cai,
cuando los primeros rayos de sol
apaezan pente los güecos de la persiana,
morreremos
como solo muerren los seres especiales.
Sele,
serenamente,
con una sonrisa na boca.

Poema d'amor

Escribo esti poema,
non pa los soldaos
non pa los esclavos
non pa la xente que muerre de fríu nel iviernu.
Escribo esti poema pal mio amor
que ta en Poniente
cuidando'l nuesu palaciu de lluz.

Ella vela les armes,
yo coso los botones del so abrigu.
Ella prepara la revolución,
yo cuento les trenta monedes de plata.
Ella escribe los mios poemes
y yo los firmo.

Pero l'amor ye una avalancha
nun tarrén ermu.
Y al cayer la nueche
busco abellugu
nun requexu del so cuerpu.
Llueu paso les mañanes rellambiéndome,
buscando'l sabor de los sos llabios.
Los mayores y menores. Tolos llabios.
Y quixere somorguiame
nesi néctar que me dedica
na esllumante escuridá del so cuartu.

Por eso escribo esti poema
non pa los héroes
non pa los traidores
non pa los que sangren sobre la nieve
sinón pal mio amor
que ta en Poniente.

Amburiar

Si volviere a nacer
quixere ser pirómanu.

Amburiar los montes
los praos
la yerba seco.

Ver trebolgando
l'agua'l regatu.

Tastiar l'arume
a quemao de la madera.

Si volviere a nacer
quixere ser pirómanu.

Tamién hai belleza na destrucción.

Y si, como un extra les dejo una cancion de xabel vegas con su nueva banda las uvas del oxido, la cancion se llama enciendeme y para terminar esta entrada cualquier parecido musico-vocal con su hermano nacho vegas es pura coincidencia.